بو شعر مهدی اخوان ثالثین "چاووشی" آدلی شعریندن آذربایجان تورکجه سینه چئوریلمیش و بیر پارا بؤلوملری بیراخیلمیش، بیر پارا بؤلوملری دگیشدیریلمیش، بیر پارا یئرلرده ایسه "چاووشی" شعرینده اولمایان بؤلوملر آرتیریلمیش بیر قوشقودور.
یولا آددیم قویان، افسانه لرده یول دؤگنلر تک
یول اوسته ییغدیغی چنته چیگینلرده
سیخیبدیر پنجه سینده خیزران دگنک
دئگینکن کن، سکوت ایچره
اوفوقدا آی تازا باتمیش
او کیمسیز، کیمسه سیز افسانه لی یولدا
بیزیم ده یولچولوق واقتی گلیب چاتمیش
گؤروندو بیر هاچا، اوچ یول
نئجه؟ اوچ یول؟ کی چوخ یوللار
ساریلمیش سارماشیق تک، افعی یه بنزر
بیلینمزلیکده باشلار، سونسوزا دوغرو گئدن یوللار
یونولموش داش کتابت له یازیلمیش
هر یول اوسته، بنزه ییشسیز باشقا بیر باشلیق
بیرینجی: شنلیگین دینجلدیگی، عیش و نشاط ایچره
بولاشمیش ننگه، آنجاق شهر و آبادی و باغ ایچره
ایکینجی شأن و شهرت، ننگ و رخوت سه
اگر باش قاوزاسان، غوغا
و گر سوسسان، او دا سوسغون
اوچونجو سونسوزا دوغرو گئدر- گلمز
داریخدیم، چوخ داریخدیم
بوردا هر ساز اینجیدیر روحو
گئدک، آل چانتانی یوکلن
قاییتمازلیق یولوندا آتمالی آددیم
گؤرک هر یئرده بو گؤی عینی رنگینده؟
بیلیرسن، گؤیلره چاتماز بو یول سوندا
چاناقلا قان ایچن بهرامه
عارسیز، قحبه ، دول، ناهیده
چاتماز یول
او جنتلر کی شاعرلر یاراتمیش یوخ
نه زمزم قایناغی، نه هوری و قیلمانا
چاتماز یول
قاراچی گنج قیزلا اوینایان ساغر توتان شعره
بو چاتماز یول
بو یول بیر تانریسیز صحرا یولو،
دیوانه لر تک قاینایان قانیم،
و هر نبضیمده مینلر اولدوزون
سؤنموش، قارالمیش کؤسسگینده بیر قیویلجیم تک
تازا روح گؤزله ین بیر جان
داریخدیم، چوخ داریخدیم
قالخ گئدک، آل چانتانی یوکلن
قارالدی بوردا گؤی، ماوی دگیل آرتیق،
اوفقدان قاوزانان آی یوخ، قارانلیقدیر،
سولار شاققیلداییب آخمیر، رکود ایله بولانلیقدیر
بوغولغانلیق، دومانلیق، گؤز گؤزو گؤرمور،
یئتن قوردون گؤزو آج، قارنی توخ، شوغلو چوبانلیقدیر
یئتر دؤزمک، یئتر سوسماق، یئتر ناله،
بو سسلر گوجلنیب، چئوریلملی دیر گوجلو عصیانه
داریخدیم، چوخ داریخدیم
بوردا هر ساز اینجیدیر روحو
گئدک، آل چانتانی یوکلن
قاییتمازلیق یولوندا آتمالی آددیم
داریخدیم، چوخ داریخدیم،
قالخ گئدک، آل چانتانی یوکلن
کؤلن ، نوامبر 2018
