آچیق سؤز یولداشلاری
نشریه میزین ۶-نجی ساییندا میللت سؤزجوگو و آزربایجان دا مدرن میللیّتین شکیللنمه سی نی گئنیش اولاراق اله آلدیغیمیز اوچون قیسساجا بعضی تاریخی مسئله لره توخونوب ،آزربایجان میللتی و اونو بیر میللت ائدن عنصرلارا گؤز آتیب،میللی حرکات قونوسونو اله آلاجاغیق.
بوگون ایران آدلانان جغرافیا دا تورک لرین مین ایلدن آشقین حؤکومت ائتدیگی هر کسه آیدین دیر؛غزنوی لر،خوارزم شاهلی لار و سلجوقلو امپراتورلوق لاری حؤکومت مرکزلرینی خوراسان و ایچ بؤلگه لره قورموش اولسالار دا،آزربایجانین اوغوز تورکلرینین مرکزی اولماسیندان سبب، زمان زمان بؤیوک تورک دؤولت لری آزربایجان مرکزلی اولدو.
اؤزللیکله قاراقویونلولاردان(۱۴- یوزایل)قاجارلارا (۲۰-اینجی یوزایل)اولان زماندا ۵۰۰ ایلدن آرتیق آزربایجان مرکز اولماقلا، بوتون ایران آدلانان جغرافیانی دا ایچرن گئنیش بیرحدودا حؤکوم سورموشدور.
بیر دیگر یاندان یونان و عرب تاریخی قایناق و خریطه لرینین هاممیسیندا آزربایجان آدی و حدودی جغرافیاسینی دا گؤرمک مومکوندور؛بو مسئله ده، چوخ واضح شکیلده آزربایجان جغرافیاسینین بؤلگه ده نه قدرغالب اولدوغونو و آزربایجاندا یاشایان تورک لرین ایلک میللت لشمه پروسه سی نی گؤزلر اؤنونه سئرمکده دیر.
گولوستان وترکمنچای معاهده سی ایله ایکیه بؤلونن آزربایجان جغرافیاسیندا ایلک قوزئی ده ۱۹۱۸-اینجی ایلده مدرن دؤولت-میللت دوشونجه سی آلتیندا بیرینجی دفعه آزربایجان آدی ایله بیرمدرن جمهوریتین قورولماسی بیر نوع قوزئی ده بوگونکو دؤولتیمیز اولان ایکینجی آزربایجان جمهوریتی نین قورولوشونا الهام قایناغی اولاراق ، گونئی ده ایسه مدرن آزربایجان میللیّتی و میللتچی لیگی نین شکیللندیرمه سینده أن اؤنملی عنصر اولموشدور.
گونئی ده مدرن آزربایجان میللیّتی دوشونجه سی قاجار دوره سی نین سونلاریندا خیابانی حرکاتی ایله باشلاییب پهلوی دوره سینده ۱۹۴۵-اینجی ایلده آزربایجان میللی حؤکومتی نین تأسیسی ایله تجلّی ائتمیشدیر. تاریخین بو برهه سینی گونئیده کی آزربایجانلی لارین سیاسی-جغرافی آنلامدا بیر میللت اولماسی نین و مدرن میللیّتی نین شکیللندیگی دؤنم ده آدلاندیرا بیلریک.
پهلوی لرین بیر کودتا بیچیمینده ایش اوستونه گئلمه سی و ممالک محروسه(بوگونکو ایران جغرافیاسی)نین چوخ میللت لی بیر بؤلگه اولماسی و بو میللت لری بیر آرادا توتما و یؤنتمه سیاستی،پهلوی لری یئنی ساختا تاریخ یاراتما و بوتون میللت لری ایرانلی-آریایی جعلی بیر کیملیکده گؤستریب، سؤمورگه و استثمار آلتینا آپارماق اوچون بیر فاشیستی دؤولت قورماغا یؤنلندیردی.
بو سیاست دوغرولتوسوندا دیگر میللت لرآرادان گئتملی و یالنیز فارس دیلی و مدنیتی وانگلیس-ماسون لابی سی نین یاراتدیغی جعلی تاریخین حاکم اولماسی تکجه شرطیدی.
آنجاق آزربایجان تورک میللتی ایچینده، کی اؤنجه دن میللتلشمه نی تجربه ائتمیشدی بو چیرکین سیاست هر زمان دایانیشما و مقاومت ایله قارشیلانیب و میللی حرکاتین داها دا سیاسی لشمه سینه و ایرلی گئتمه سینه سبب اولدو.
ایران اسلام جمهوریتی نه قدر دینی شعارلارلا مستضعف لرین حامی سی اولاجاغی پروپاگانداسی ایله ایش اوستونه گئلسه ده عیناً پهلوی لرین غیرفارس میللتلرینه اولان فاشیستی سیاستی نی قاباغا آپاریب و ۱۳۸۵آزربایجان قیامی باشدا اولماقلا هر دؤنم آزربایجان میللی حرکاتی ایله قارشی قارشیا قالدی.
گونئی آزربایجان میللی حرکتی:
گونئی آزربایجان میللی حرکاتی آزربایجان تورک میللتی آراسیندا اولان میللی دویغولاردان متولّد بیر مدنی،حقوقی،اقتصادی،اجتماعی و سیاسی مبارزه و آیاقلانمادیر. بو مبارزه و آیاقلانما ایران مرکزی حؤکومت لرینین آزربایجان تورک لرینه قارشی یئریتدیگی هر بیر ظالمانه سیاسته قارشی تورک میللتی نین دیرنیش و عصیانی دیر؛ بو حرکت میللتیمیزین اؤزمقدّراتینی تعیین ائدیب وبو سؤمورگه دن چیخیب و باغیمسیزلیغی نی اعلان ائده نه دک دوامی اولاجاقدیر.
نه موتلو بیزه کی پهلوی و اسلام جمهوریتی نه قدر بیزیم میللی هویّتیمیزی آرادان آپارماغا سیاست آپاریب هزینه ائتسه ده هر زمان میللتیمیزین بؤیوک قسمی آراسیندا و اونلارین اورگینده میللی دویغولار جانلی دیر و هر زمان هرساحه ده چوخ ساییدا میللی دویغولارا حرکت قاتان و میللی یولدا موبارزه آپاران اؤنجولر،ضیالی لار و آیدین انسانلار وار.
گونوموزده میللتچی و وطن پرورعائله لرین یئتیشدیردیگی هرآلاندا میللی حرکاتا کؤنول وئرن هنرلی صنعتکارلاریمیزدان،ایدمانچی لاریمیزدان توتون،قلم اهلی ادبیاتچی و تاریخچی لریمیزو...چوخ ساییدا میللتچیمیز وار کی هربیری آزربایجانیمیزین آزادلیغی اوچون جان آتیب یئنی قان و جان قاتماقدادیرلار. آنجاق بیر یوجه میللتین فعالیت و حرکاتینی نتیجه یه یئتیرن اولان، منسجم بیرحقوقی و سیاسی سیستم دیر کی ایلک اولاراق بو حرکاتا اولوسلارآراسی(بین الملل) اعتبار قازاندیریب سونراسی ایسه بو میللی حرکاتین نهایی قورتولوش ساواشینا تبدیلینده اوزرینه دوشن اَن بؤیوک وظیفه نی صاحبلنسین.
نه یازیق کی نهایی مبارزه فازی یا همان قورتولوش ساواشینا گیرمه دن میللی حرکاتین ایچینده سیاسی رقابت لردن دولایی اختلاف لار میدانا گئلدی و ایستر ایستمز ایچری و خارج ده چالیشان میللی فعال لار آراسیندا آیریلمالارا سبب اولورکن،میللت ایچینده اومودسوزلوق و یئنی نسل آراسیندا حرکتین گئله جگیینه دایر بدبین لیک یاراتدی و میللی حرکاتین متمرکز گوجونو داغیتدی.
گونوموز یئنی نسلی ایران حؤکومتی نین وجودا گئتیردیگی بیرچوخ فاجعه ایله اوز اوزه دیر. بیر جامعه ده کی گنجلر اؤزللیکله ده یئنی یئتمه لر ماده باغیملی لیغی و اعتیادی بیر تفریح حالینه گئتیرمیش چوخ طبیعی دیر کی چوخ اخلاقسیزلیق لار عادی لشیب و مُد حالینه گئلمکده دیر.
آزربایجان یئنی نسلی بو مسئله لردن علاوه فارس فاشیزمینین تورکلوک و تورکلره قارشی منفی پروپاگانداسینا معروض قالیب،آسیمیله سیاستینه قوربان گئدرک، مرکز و مرکزگرالیغا متمایل ائدیله بیلمه تهلوکه سی آلتیندادیر.
یئنی نسل میللتچی لرین میللی حرکاتا چاغری سی:
میللی حرکاتین بوتون مدنی وسیاسی جناح و جبهه لری اَن آزیندان بو تهلوکه یه قارشی اولموش اولسا دا بیرگه و واحد حرکته گئدن یولو آچمالی و گنجلری اومودسوزلوغا دئیل میللی قوتسال حرکته یاخینلاشدیرمالیدیر. آنجاق کؤکلرین تورپاق دا یئری مؤحکمدیرسه بو کؤکلو آغاج ثمر وئره بیله جکدیر.
یئنی نسلی تمثیلاً آچیق سؤز نشریه سی اولاراق ایلک اؤنریمیز، واحد حرکته گئدن یولدا هاممیمیزین ال بیر ومتّحد اولماسی و گوجلو مدیالار قوروب میللی حرکاتین مدنی فعالیتینی آرتیرماقدیر.
بیز بیر اسکیلر مین آرتاریق
