اولیندن عادتیم دیر سؤزده یالان دئمه‌رم
من توركجه دانیشارام دیله زبان دئمه رم
آنام منی اوشاقلیقدان تورك دیلی دانیشدیریب
آتام منه چؤره ك وئریب چؤره گه نان دئمه رم
***
من آنامین امجگیندن توركجه سود اممیشم
ایندی‌ده امجك دئییرم داهی پستان دئمه رم
سو ایچنده ذوق ائده‌رم داد وئرمز آغزیمدا آب
سرین‌له‌سم كؤلگه‌لیكده دا سایبان دئمه رم
***
دریالاردا گمی‌لری گزدیرر گمیچی لر
چوخ گؤزل دیر گمیچی‌لیك دا كشتیبان دئمه رم
ائو ـ ائشیگیم ایشیقلانار قوناقلاری گؤرنده
من قوناغی چوخ سئورم آمما مهمان دئمه رم
***
آنام منه دون تیكردی سیریق ـ سیریق آرخالیق
كؤینگیمین اتگینه داهی دامان دئمه رم
اول ائوده اوشاقلارا تورك دیلینی اؤیره‌درم
آنا یا آنا دئیه‌رم دا مادرجان دئمه رم
***
بیر گؤزه‌لی تعریف ائتسم توركوجه سؤز قوشارام
كیپریگین اوخ قاشلارین یای، ابرو كمان دئمه رم
بئشیگه گهواره دئمم او منی ییرقالاییب
صوبحه كیمی گودوكچویه من نگهبان دئمه رم
***
قونشویا همسایه دئمم من یولداشا دا همراه
اوغولا اوغول دئیه رم هئچ پسر جان دئمه رم
اكینچی‌یم یوخ كشاورز، تورپاغا خاك سؤیله‌مم
اولدوزا ستاره دئمم گؤیه آسمان دئمرم
***
گؤی گورولدار یاغمور یاغار یاشیل‌لانار یایلالار
هر نه قدر یاغیش یاغسا اونا باران دئمه رم
دگرلی‌یه دگر وئررره‌م ارزشدن چیخماز باشیم
اوجوزا اوجوز دئیه رم داهی ارزان دئمه رم
آتا ـ بابام تورك دور منیم توركوجه دانیشارام
فارسی دا خوش شیرین دیلدیر خوشا یامان دئمه رم
دده كاتیب تورك اوغلویام چوخ دادلی دیر دیلیمیز
ماهی یه بالیق دئیه‌رم سونا پایان دئمرم.
