Əziz Azərbaycan Türk Milləti və azad dünya ictimaiyyatı;
21 Fevral Dünya Ana Dili Günü, başqa bir çox sömürgə altında yaşayan millət kimi, Güney Azərbaycan və İran Türklərinə də sömürgə və ayrı seçkiliyi xatırlatmaqdadır. Çünki ana dildə təhsildən məhrum olmaq bütün ayrı seçkilik və məhrumiyyətlərin ana qaynağıdır və məhz ona görə də İranda yaşayan qeyri Fars millətlər üçün bu gün sömürgə altında yaşamağın simvoludur.
Çox millətli yapıya sahib olan İran ölkəsinə hakim olan faşist və sömürgəçi zehniyyət, ölkənin torpaq bütünlüyü və sözdə milli birliyi bahana edərək ölkə xalqlarının birinin dili olan fars dilini digər xalqlara təhmil etmiş və bununla da geniş miqyaslı və hər tərəfli bir sömürgəçilik sisteminin təməlini qoymuşdur. Halbuki modern dünyada artıq hamı bilir ki bu tərz yanaşmalar sadəcə anti demokratik və sömürgəçi rejimlərin uydurduğu bahanalardır. Bu bir faktdır ki millətlərin demokratik və insani haqlarının təmin edilməməsi gerçəkdə nəinki bir ölkənin milli birliyi və ərazi bütünlüyünü təmin etməz, tam tərsinə onlara təhlükə yaradar.
Şübhəsiz bu gün İranda fars bölgələri ilə qeyri Fars bölgələrin arasında yaranan inkişaf və rifah uçurumu və onun nəticəsində ortaya çıxan toplumsal və siyasi ayrışmanın təməlində ana dili yasağı məsələsi var. Çünki elmi faktlarda görə, qeyri fars bölgələrdə ana dildə deyil, şagirdlərin tanış olmadığı məcburi bir dildə eyitim verilməsi, bu bölgələrdə təhsil göstərgələrinin pisləşməsinə və təhsildə ümumi geri qalmaya səbəb olmaqdadır. Fars bölgələr ilə qeyri fars bölgələr arasında təhsil göstərgələri uçurumunu sadə bir araşdırma ilə görülə bilməkdədir. Təbii olaraq təhsildəki bu ümumi geri qalma; ali təhsil, iş fürsətləri əldə etmək, bölgənin ümumi rifah və inkişafı və bir sözlə bütün yaşam sahələrinə mənfi təsir qoymaqdadır. Nəticə isə bu gün İranda ortaya çıxan böhranlı vəziyyətdir.
Bu nədənlə təkid edirik ki ana dili məsələsinə sadəcə bir dil məsələsi deyil, bir çox təhsil, iş piyasası, iqtisadi, toplumsal və siyasi böhranların təməli və kökü kimi baxmaq lazımdır.
(Güney) Azərbaycan Siyasi Quruluşlarının Əməkdaşlıq Platforması olaraq İran adlanan ölkədə bir əsrdən bəri davam edən bu haqsızlığa son verilməsini və İranda yaşayan bütün millətlərin ən təbii haqqı olan ana dildə təhsil haqqının təmin edilməsini tələb edirik. Inanırıq ki İranda ayrı seçkilik, sömürgəçilik və faşizmə son qoyulmasının ən təməl gərəyi budur.
Bu vəsilə ilə də ana dildə təshil almaq haqqını müdafiə etdikləri üçün haqsız və qanunsuz həbs cəzasına məhkum olan məhbuslarımızı sayğı ilə anıb bir an öncə özgür buraxılmalarını istəyirik.
(Güney) Azərbaycan Siyasi Quruluşlarının Əməkdaşlıq Platforması
AZOH - Dirəniş – GADP
19/02/2022
