بیلدیگیمیز کیمی تونول سؤزجویو تون و تان هیجالارین‌دان اولوشان بیر سؤزجوک‌دور.
تون تورکجه‌ده قارانلیق و گئجه آنلامیندادیر و اونا قارشی اولان تان ایسه ایشیقلیق و گوندوزو بیلدیریر،
تان دان تونه سؤزونه یاناشدیقدا بو ایکی سؤزجویون آنلامینا واریریق،
تان ایشقلیغین باشلانغیجی و سحر آنلامیندادیر و تون ایسه گئجه و سویوقلوغو یانسیدیر،
«تون به تون» سؤزونه دیققت یئتیردیکجه تون سؤزجویونون آنلامینی داهادا آچیق و آیدین گؤسترمک اولار. اینسانلار کیمسه‌دن چوخ آجیقلی اولدوقدا «تون به تون» سؤزوجویونو قوللانیرلار،
بوردا ایشله‌نیلن «تون» گور و قبیر آنلامین بیلدیریر. أسکی تورکلرین ایناملاریندا اولگئن گؤی تانریسی و یئرلیک یئر تانریسی اؤنملی قاوراملاردان عیبارت اولاراق ایکیلی دونیانی یانسیتماقدادیر گؤی تانریسی ایشقلیق، آری‌لیق، اولولوق، قوتسال‌لیق، ایستیلیک، دوغرولوق و خئیر سیمگه‌لرین داشیماقدا و یئرلیک تانریسی ایسه قارانلیق، سویوقلوق، یامانلیق، أکسیکلیک و قورخولوق و شر سیمگه لرین داشیماقدادیر.
تورکلرین دونیا گؤروشونده اینسانلار اؤلدوگو زامان اولو روحلار و گؤی تانریسی‌نین رحمت و یاردیمیندان یارارلانماسالار، گؤمولدوک‌لری حالدا یئر تانریسی‌نین آجیغی و اینجیک‌لیگی ایله اوزلشمه‌لی اولمالی دیر.
تون به تون سؤزونده‌کی تون ویا گور بو قارنلیق سویوق و قورخو دولو یئر آلتی دونیاسینی گؤسترمکده‌دیر.
تون ایله باغلی باشقا بیر سؤزجویه‌ده یاناشالیم، «تونوک سؤزجویو»؛ بو سؤزجوک بؤیوک عالیم ماحمود کاشغارلی‌نین «دیوان لغت تورک» کیتابیندا قارانلیق، سویوق، گوجسوز، نازیک واینجه آنلامیندا گؤستریلمیش‌دیر.
«اول» (ül) أکی ایله سوتول و شیتیل و باشقا سؤزجوک‌لرده ایسه یئر آلماقدادیر و بو أک کؤکون آنلامین داها دا آیدین یانسیتماق اوچون اونلارا قوشولماقدادیر. بئله‌لیکله تونول سؤزجویو یئر آلتیندا اولان قارانلیق و دار بیر یئر و یولدان عیبارت اولان تورکجه بیر سؤزجوک‌دور
سیامک میرزایی-ائوین زیندانی 22 اردبیهشت 1397
