بیر تورکو مَثَل وار دِئییرکی « آراز گور نه گونه قالیب کی قدم علی گودوغوینان کِچیر » ؛ ایندی آذربایجانین میللی حرکتینین درینلیک وبویوک لوگون دوشونمیین بیرنِچه معلوم احوالات لی شخص لر کی یئری گَلسه اینانین کی آذربایجانین بوتوولوگون بیر « کوردو شالوارا » ساتارلار؛ بو مَثَله اویقون اولاراق ، اوتانمادان سوسیال شبکه لرین دَه یارانان ایمکان لان سوء استفاده اِئدیب و آغزیلارینا یِئرلَشمییَن و پاتلئت لرینه یاراشمیان حال دا ، آذربایجانین گَله جَگینه ، گِدَجگینه یول گوستریلر !
هئچ دِئمَک لازیم دِئییل میللی حرکتین بویوک آفت لرین لن بیری بودورکی بیر تعداد تانینمیش آدام کی بعضی لرینین نه ایندی کی حال لاری و نه کِئچمیش لری اوزه چیخاردمالی دِئییل وبعضاً اوتانمادان ، خالقا شارلاتانلیق اِئدمه مکافات و حبس لرین دَه آذربایجان یولوندا مبارزه آپارماق لاری آدینا حسابا سوخولار ! ؛ اوزلرین سهودَن و سَفِه لیگ دَن بیرلیدرکیمی گورولر ؛ بلکده اوزلرینه هله پیس پیس دَه دولت ترکیبی تعیین اِئدیلر !
البته بو آداملارین چوخونون آذربایجانچیلیقلاری حاکمیتین سِئچیم زامانلاری دیرچَک لَنر و اوزلرین - گستاخلیق دان - آدای طعمه لرینه میللی حرکتینین وکیلی یو خسا دانیشانی تقدیم اِئدیب و آذربایجان آدینا مختلف ستاد لار ، مفته کانال لار دوزلدیب و« اپورتونیستی » یاناشماق لارینا دا تئوری قوشوب و آذربایجانین آدای سیز سئچگی عرفه سین دن ، آذربایجانا و میللی حرکتین آماج لارینا حاکمیت تورتمیش بَللی آدایلارین ایچرلریندن « ناجی » کشف اِئدیبَ و آلتدانمیش اُوآدایلارا یوکسک رای آلماق وعده سی له جیب لرین سویوب ، آخیردادا آبیرلارین آپاران لان سونرا آچدیقلاری توکان لارینین قاپیلارین اورتوب و بیر آیری سِئچگی زامانینا قَدَر آذربایجان چیلیقلاری یادلارین لان چیخار و آذربایجانا اولان هجمه و اهانت لر اوزرینده ساکت قالالار ! یانمالی یئر ی بوردادی کی بو آداملار اولدوخلاری محفیلر ده ده بیر عده مانقورت و شاه پرست آداملارین طرفین لن آذربایجانا و آذربایجانین فخیرلی تاریخینه و شخصیت لرینه اولان تخریبات و تحریفاتلاری قارشی سیندا دا سخاوتیله سوس توتولار !
بِئلنچی آدام لار کی مَشدی بادین حیکایه سینده اولان رندلرکیمی گلنارخانیمی او قاری کیشییه آلماخ دان اوتر هره سی بیر آدا او یازیغین جیبین کَسیردیلر ( بیری شاعیر آدینا ، بیر سازچی آدینا ، بیری قازتچی آدینا ، بیری سیاست چی آدینا ) و آخیردادا گلنار یئرینه صنم خالا بیله سینه قسمت اولدو ؛ هابئله دئدیقیمیز آذربایجان چیلار مختلف آدلارینان اوزلرین میللی حرکته یاپیشدیریب و آلتدانمیش آدایلارا یوخاری « رای » وعده سی وِئرمک لرینه باخمیاراق آخیرده دَه اوچ دورد مین لن آرتیق او بِچارا لارا سَس آلانمادان گوزدن ایتیرلر ! آنجاق اوتجارت چی آذربایجان چی لارین گوجو نچه دونه سئچگیلره یانلیش قاتیلمالاری سونوچون دا هامی لارا بَلَلی دیر !
نه ایسه یاخجی دی کی هر کیمسه آذربایجانین بویوک وتاریخی حرکتینه باش چیلیق ماراخی وار سا ، اوزون بیر لیدرکیمی گوستریب و حرکته عاغیللی و اویقون یون وئریب و یول گوسترسین ، یو خسا میللتین قولاغی بوش بوش سوزلره بوشلی دِئییل !
بونو بیلمَلییگ کی هر بیر ادعالی کس میللی حرکتینین ایچرینده ایزلَنیر و گوندملَنیر و هر زامان یولدان آزسا اونون کئچمیشینه باخما دان آتیلیر , بئله دِئمک اولار کی میللی حرکت بیر دنیز کیمی یالنیز دیری بالیق لاری اوزونده ساخلاییب و اونلاری باغرینا باسیر ، آنجاق اُولموش بالیقی نهنگ اولسادا دالغالاریلان شاپّاتییب سوون اوزونه چکیب ولَشَسین ساحله تولازلار !
اونا گوره کیمسه کئچمیشنده دایانمامالیدیر و حال زامانین یانلیش باشا دوشمَمَلی وگَلَجَکی دَه سهو دوشون مَمَلیدیر ، و اوزون هر زامان داخلی و خارجی مساله لرین دوزآراشدیرماقینا معاریف لندیریب وخالقینا یول آچمالی دیر ، یوخسا میللی حرکته باشچیلیق فیکرین باشینلان آتمالیدیر ! البته هر کیمسه کی اوز شرایطینه باخاراق اَلین لن گلن قدر( آز چوخونا باخمیراق ) آذربایجانین حاقلاری اوزرین ده صداقتیله و ادعاسیز چالیشیر چوخ دَیرلی دیر و درین حورمتلری واردی و اساس دا میللی حرکتین تملی بو ادعاسیز فعال لارین گوجونده قورولوب .
بوسوزو بوتوون مدیا لاری اولانلار ، تلویزیالاری اولانلار و تریبونلاری اولانلاردا باشا دوشمه لی دیلر و گرکیر کی آداملاردان قات قات اونجه ، آذربایجانین منافع لرین و حاق لارین نظرده ساخلاسین لار ، نیه کی هر بیر کسین هربیرسببه و هر زامان یولدان چیخیب و آزماسی اولونماز دِئییل ! آخیردا بو قیسا یازیمی شهریارین بوشعریله باشا چاتیریرام :
« بورکو باشا قویان گرک بورکونه ده بیر یاراشا » !
