40 ایل بوندان قاباق بیرهـدف سیز دئوریم نتیجۀ سیندۀ جهالت قوُیوُسوُندا چیرپینان میللت دیکتاتوُر شاه رژیمینۀ قارشی هئچ بیر میللی دموُکراتیک آلترناتیوِی اوُلمادان ایستعمارین ایللر قاباقدان تربییۀ ائدیب حاضیرلادیقی خمئینی کیمی موُللانی تاریخین قارانلیق قوُیوُسوُندان چیخاریب بوُیوُک دبدبۀ ایلۀ گئتریب ، اوُز سرنویشت لرین یالانچی ؤ حیلۀ گر بیرشییادین ألینۀ تاپشیردیلار.

بوُحادیثۀ هم غرب دوُولت لری ؤ همدۀ یوُز ایللربوُیو حسرتیندۀ اوُلدوُقلاری مرتجع موُللا لاراوُچوُن بیر قیزیل فرصت ایدی ، بوُ فرصت دن خمئینی ؤ چئورۀ سیندۀ اوُلانلار سوء ایستیفادۀ ائدرئک عصیان اتمیش خالقی ایلک گوُندن آلدادماقا باشلییب ، حیلۀ گرلیکلۀ   (پاریسدۀ) یالان ، بوُش وعدۀ لر وئرمئگۀ باشلییر، لاکین تئهرانا گئلدیکدن سوُنرا وئردیگی وعدۀ لرین عکسینۀ اوُلاراق آلدانمیش خالقی سئویندیرمئگ اوُچوُن أوولدۀ شاه رژیمینین سرکردۀ لرین آردیجیل اوُلاراق اعداملارینا فیتوا وئریر ؤ آردینجا اوُنوُ حمایۀ ائدن شاه رژیمینۀ آلترناتیو ساییلان سوُلچوُ تشکیلات لارین أعضاسین توُتوُقلایب دستۀ دستۀ قتل عاملارینا باشلییرلار .

خمئینی ذاتن بیر توُرک دوُشمانی اوُلدوُقوُنا گوُرۀ آذربایجاندا خصوصی ایلۀ 1358 ینجی ایلدۀ تبریزدۀ   بوُیوُک قیرقینلارا باشلییرلار، قئید اتمئک لازیم دیرکی ایران عراق محاربۀ سیندن سوُنرا ، زیندانلاردا اوُلان اوُن مینلرلۀ گوُناهسیز اینسان لاری گئنج ، ایخییار، قادین ؤ آز یاشلی اوُشاغلارایسۀ کوُتلوی اعداملارینا فیتوا وئریر، اعدام اوُلوُنلارین آراسیندا بوُتوُن ایران میللییت دن اوُلان دئییرلی اینسانلاردا وار ایدی، بوُگوُن اوُ کوُتلوی اعداملاردان 31 ایل کئچمیشدیر، آمما هئلۀ دۀ اعدام اوُلوُنموشلارین آنا ، آتا ، باجی ، قارداش ، حئییات یوُلداشلارینین اوُریی لری داغلی ؤ دائمن گوُزلری آغلار سوَنسوُزکئدرایچیندۀ دیرلر ؤ زامان زامان هئچ تانیمادیقلاری آدسیز نیشان سیز مزارلارا گئدیب بیر دستۀ سوُلموُش چیچئکلۀ عزیزلرین یاد ائدیرلر.

آمما بوُ 40 ایللیک فاجیعۀ لی پروسئسدن کیملر فایدالاندی ؟ أگرآوروُپا دوُولت لرینین خمئینی گئلمۀ دن قاباقکی ایقتیصادی بحران لارین نظردۀ آلارساق ، ایسلام رژیمی قوُروُلدوُقدان سوُنرا سانکی قیزیل معدنینۀ أل تاپیرلار ، یئرکی آوروُپانین بوُ گوُنکو دوُروُموُن قیساجاسینا نظردن کئچیرئک ، سوُنرا بیلینرکی نۀ کیمی بوُل ، صاحیب سیز ثروتلرۀ گئجۀ گوُندوز یاغمالاماقلارین بیلمئگ اوُلار، داها بیر اوُنئملی ؤ عین حالدا نظرلردن اوُزاق دوُشموُش مسئلۀ ایسلام رژیمی قوُروُلماق همان خمئینی نین أمری ایلۀ آمئریکا سیفارتی ایشغال اوُلوُنوُر ؤ 40 ایللیک پروُسئسدۀ آمئریکا ایران بازارلاریندان محروُم اوُلوُر.

اوُستۀ لی نظردۀ آلمالییق کی اوُ زامان ایرانین نفوذ سایی 35 نفرمیلیون ایدی کی سرعتلۀ آرتاراق بوُگوُن 85 میلیون نفر اوُلموُشدور ، بو آوروُپا ، روُسییۀ ، چین ؤ باشقالاری اوُچوُن بوُیوُک بیر نعمت ؤ وازکئچیلمز موُقعییت دیر، آوروُپالیلارین تئهران موُللا رژیمیندن جیددییت لۀ موُدافعۀ لرینین اوُنئملی سببلریندن بیری دۀ آرتان نفوذ سایی ؤگئنیش مصرف بازاری اوُلدوُقوُدور.

دئمئک اوُزلرین (دموُکراسی ؤ اینسان حاقلاری) مودافعۀ چیسی گوُسترن یالانچی   دوُولتلر بهمن دئوریمیندن سوُنرا موُللالارین آچدیقی نعمت لرلۀ دوُلوُ سفرۀ نین باشیندا اوُتوُروُب بوُتوُن ایدعالارین اوُنوُداراق موُللالار ایلۀ قارداش اوُلوُب آج قوُرد کیمی آلدانمیش میللت لرین ثروت لرین ، معدنلرین سپاه پاسدارانین سیلاحینین گوُجوُنۀ آرخالاناراق ، گئجۀ گوُندوُز غارت اتمئگۀ باشلادیلار کی هئلۀ دۀ داوام اتمئکدۀ دیر، .

بو گوُن ایران آدلانان یئردۀ سوُزوُن دوُغروُ معناسیندا حاکیم قوُوۀ قاچاقچی ، ترورچوُ سپاه پاسدارانین یوُکسئک مقاملی مافیا باشچیلاری اوُلان سردارلاری اوُنلارین آرخاسیندا دوُران خامنه ای ؤ شورای نگهبانین حیلۀ گراوُغرو موُللالاری دیرلار، سپاه پاسداران بیر اوُختاپوُس کیمی تک ایران یوخ ، بئلکۀ اوُرتا دوُغوُدان ، آفریقا ، لاتین آمئریکایا قئدر قانلی جایناغلارین اوُزادیب ، جوُربۀ جوُر قاچاق ؤ ناکوتیک تیجارتی ایلۀ مشغوُل دوُرلار، سپاه پاسدارا نین بوُ اوُلکۀ لردۀ 7000 دن آرتیق میلیاردلار دوُلارلیق مافیا ؤ قاچاقچی شیرکت لری وار.

قئید اوُلوُنموش حقیقت لری نظردۀ آلاراق، بیز گوُنئی آذربایجان توُرکلری نین ؤطنیمیزین میللتیمیزین قارشیمیزدا بوُیوُک تاریخی ؤظیفۀ لریمیز وار، داخیلدۀ ؤ خاریجدۀ اوُلان میللی فعاللار بوُ گوُنلردۀ جریان ائدن آمئریکا ، آوروُپا ، روُسییۀ ؤ سایرۀ لرین آلدادیجی اوُیوُنلارینا آلدانما مالییق بوُ قوُدرتلر اوُز منافع لری اوُچوُن دیدیشیرلر، باشقا طرفدن ایسۀ شاهچیلار، پان فارسلار، سوُلچوُ پان ایرانیست لر بوُتوُن سایت لاریندا ، دانیشیقلاریندا باجاردیقلاری قئدر موُللا رژیمینۀ یوُل گوُستریرلر، بیرحالداکی ایران آدلانان یئردۀ آجلیق ، یوُخسوُللوُق، ایشسیزلیک ، اعتییاد ؤ جوُربۀ جوُرفسادلار جایناقیندا أسارتدۀ، زیندانلاردا، چیرپینان اینسانلاری، اوُزللیکلۀ آذربایجانلی زیندانلیلاری هئچ دوُشوُنمورلر! ؟

ترامپ برجام دئیلن سازیشی بیرطرفلی لغو اتدیکدن سوُنرا ، تئهران رژیمینۀ قارشی سرت تحریم لر اعمال اتمئکلۀ ، آردینجا باش وئرن حادیثۀ لر ، آوروُپا لی لاری ؤ رژیمی موافعۀ چیلری اوُلان رنگارنگ پان فارسلار پریشان اوُلدوُقلاری حالدا رژیمی قوُروُماق هـدفی ایلۀ دوُرمادان آزدیریجی موصاحیبۀ لرۀ تلاشلارا باشلامیشلار، بو تلاشلارین سوُنوُ نۀ اوُلاجاقسا ، بیز آذربایجان توُرکلری آیق سایق اوُلمالییق .

سوُنوُندا سیاستی بیلمئگ اوُلماز، 40 ایل آوروُپا اوُچوُن هئرگوُن قیزیل یوُموُرتا وئرن توُیوُقوُن باشی کئسیلۀ جئک یا یوُخ ؟ !

2019 / 7 / 28 ــ آذرخش