او توتوب الینه قلم آلیب وطن یازماق یئرینه خائین آراییشینا گئچن یاشی گئچمیش دونیا گؤرموش لره دئمک ایسته ییره م:
اوزون بیر سس فایلی پایلاشماق اوچون زامان آییردینیز, اونون قیرخدا بیرین اوتوروب دوشوندونوزمو بو هوادا اوچان افترالار, بو هئچ بیر دئیتا بئیس ده سیغمایان امضا کامپانیالاری میللی حرکته نه یاراری نه ضرری اولاجاق؟!
هئچ اوتوروب اؤزاؤزونوز ایله دوشوندونوزمو بو دامغالادیغینیز اینسانلار سیزده ن بلکه داها چوخ وطن قایغی سین چکیرلر و یا سیزده ن داها چوخ وطنیمیز اوچون بدل اؤده ییب لر؟ بللی دیر کی حیرص سیزین گؤ‌زلرینیزی بورویوب و حقی حقیقتی گؤرمه زده ن گلیرسینیز.
اؤزومه گؤره و بیلدیم کی سیزین بو بیر ساعاتا یاخین بیاناتینیزا کی حقی داها چوخ تاپدالادیغینیز یئرلره فیکریمی بیان ائدیم. البته حق ده ن ده گئچمه مه ک گرکیر, بو نئچه بند لیک یازیدا سیزین بو ۴۲ دقیقه لیک اندر بیاناتینزین حققین ادا ائتمه ک هر ایگیدین ایشی دئییل و کیتابلار دولوسو جواب یازماق اولار. دئمه لییم کی بو دانیشیق دا نئچه بندی سئچمه ک د ه اینسان اولانین باغرین چاتلادار.
سس دوسیانیزدا ۵ شهریور چاغریشین دئییرسیز کی کیمسه سورغولامادی (😄). بودا سیزین باخیشینیزدی. آمما یاخشی خاطیرلاییرام او اودالارکی کلاب هاوس دا قورولوردو و سس سیزجه سینه گلیب دینله ییجی لر آراسیندا اوتوروب ان آزی ۳ آیدیر بو تشکیلات لارین هر سؤزونه بیر قولپ تاخان کلاب قهرمان لاری نین دینله ییب سونرادا گؤرمه زده ن گلیب اینکار ائدیرسینیز. ائله او کلاب قهرمان لاری کی هفته ده کامپانیا – کامپانیانین تپه سینه میندیریردیلر, او قهرمان لارکی سادجه اؤزلرین دوغرو بیلیب و اونلاردان ساوایی کیم وارسا یانلیش دوشونور و بو حرکته خیانت ائدیرلر.
دئییرسینیز کی دیلیمیزه اؤنم وئره ک, سونرا گلیب بیانیه لرینیزی فارسجا دیلینده یازیرسیز, البته منه گؤره بوندان سونراکی بیانات لارینیزی گرک کوردجه, ائرمنیجه, روسجا, فرانسیزجا, یونانجادا وئره سیز, من بو قصورو سیزده گؤردوم لوطفا بوندان سونراکی بیانیه لرینیزده بو اؤنریمی اویقولایاسینیز. ایچیمیزده اولان گرک سیز آنلاشمامازلیق لاری نیه گرک قان دوشمانلاریمیزین خبری اولماسین؟ بو بؤیوک بیر عیب دیر سیزه بئله داورانیش لار سیزین دئموقرازینیزی سورقو آلتینا آلار!!!
سیز الینیزه بیر قلبیر آلیب و اله مه ک پئشینده سینیز, و نده ن ایسه ایش بیرلیغی ائده ن ۴ تشکیلاتی اله ییرسینیز!!! حال بوکی بونلار (بوتون تشکیلاتلار اؤزه للیک له ایش بیرلیغینده کی تشکیلات لار) بیردیر لر و ایریدیرلر. سیزده بیلیرسیز کی بیرلیکده ن ظفر دوغار و بو دوغوم ایسه هر زامان سانجی لار لا بیرلیکده اولار, سانجی لار سونرا او نفس سس لری بوتون کاییناتی حیاتا باغلار.
خالقیمیز اوزون ایللردی کی تشکیلات لاری بیرلیک اوچون چاغیریر. ایندیکی بو تشکیلاتلار بیر اولوب سیز پارچالاما پئشینده سیز! سیز بو خالق ایله بیرگه میسینیز یوخسا خالقین ایسته کینین قارشیسیندا؟
بو تشکیلات لارین هر هانسی بیرینده اویه اولمایان بیرینین دانیشیغین عثمان کؤینه یی ائدیب و اونو اساس آلاراق بو تشکیلاتلارا هجمه گتیریرسیز!!! حال بوکی ائله سیزین یانینیزدا دورانلار زامانیندا ائله بو خالقین دوشمانلارین گتیریب مئدیالاریندا یئر وئریردیلر. ایندی بو شخص گلیب تشکیلات لارا دستک اولوب نده ن بو تشکیلاتلاری چیرپیرسیز؟ بو چیفته استانداردین نده نی نه دیر؟ سیز هر حالدا یاشینیزدان دولایی گرچک لری گؤرمه زده ن گلیرسینیز و یا زامانلا ایشینیزه گلمه دیغی اوچون گؤز یوموب اونوتمایا چالیشیرسیز. ان آزیندان ایجازه وئرین بوردا سیزین صمیمیتینیزه شوبهه ایله یاناشیم. آیریجا اگر بؤلگه بازلیق سا من اؤزوم سولدوزلویام بیلیره م کیمه نئجه جواب وئره م. آمما من بؤلگه بازلیق و قلمرو یاراتما پئشینده دئییلم.
سون بیر ایل ایچینده دونیانین اونوتولموش نقطه سی وطنیمیزی آوروپا, آمریکا و کانادا کیمی اؤلکه لرده گونئی آزربایجانی بو اؤلکه لرین و اؤزللیکله قوزئی آزربایجان و تورکیه مئدیالارینین مانشئت لرینه داشیان و گونئی آزربایجاندان سؤز ائتدیره ن ائله بو تشکیلات لارین ایش بیرلیغی ایله فایناقلاندی, آمما هئچ بیری اؤز آدین دیللر ازبری ائتمه دی و تمام قایه لری گونئی آزربایجان گئرچک لرین دونیادا دیله گتیرمه ک ایدی و بو گؤره وی ایسه باشاری ایله یئرینه قویدولار, البته دئمه لی یم کی داها اؤنجه سؤزون ائتدیغیم کلاب هاوس قهرمانلاری گئنه تخریب گؤره و لرین دوام ائتدیریردیلر.
چوخ یاخشی خاطیرلاییرام کی گئچن ایل تام بو عرفه لرده گئنه اورمو گؤلو اوچون چاغریش قونوسو وار ایدی و سیزلر گلیب دئدینیز زامانی دئییل بیز سیزه زامانین دئیه ریک بیر نئچه گون سونرا, او نئچه گون سونرا اولدو بیر ایل و سیزده ن سس یوخ و سیزه گؤره زامانی هله گلمه ییب حال بوکی بئی لر وطن الده ن گئدیر, هر بیر ثانیه بلکه اونلارجا آزربایجانلی کانسر خسته سی اولور, سیزین بو حئیرت وئریجی اعتراضا چاغریش زامانی بلیرله مه نیز آچیقجاسی شاشیرتیر اینسان اولانی.
اگر بیری سوسور قارا یاخمالار قارشیسیندا بو اونا دلالت ائتمه ز کی بونون آیاقیندا چامور وار و اوتانیر و یا قورخور ویا ایشینده بیر آخساقلیق وار یوخ!!! سوسور چونکو وطنین الده ن گئتمه سین ایسته میر.
تشکیلات لار اوچون باشقا بیر چوخ ایتتیهام لار یاخدینیز, چامور آت ایزی قالسین, آمما چوخ سئودیغیم بیر اینسانین منه دئدیغی سؤزو بوردا بیرداها اؤزومه و بوتون گونئی آزربایجانین سعادتی اوچون چالیشان تشکیلات لارا تکرار لاماق ایسته دیم:
دیری اولانین آرخاسیجا چوخ دانیشیق لار اولار, بیری اؤلور ایسه سؤزلرده بیتر. دئمک بو تشکیلاتلاردا دیری و ایریدیر لرکی آرخالاریجا دانیشیق لار بیتمیر و بو اونلارین نفسینین گور اولدوغونون آنلامیندا.
سون سؤزوم سیزه جناب اکبر آزاد:
لوطفا آدینیز کیمی میللی حرکتیمیزده بؤیوک لوک ائدین و سوی آدینیز کیمی اوزگور و آزادلیق دان یانا اولون.
