Dünya ana dili günü ilə bağlı 8 təşkilatın ortaq bildirisi

1948 və 1952- ci illər arası tarixi olaylar Dünya ana dili günü yazılmasına nədən oldu. Bu illərdə bənqal dili Pakistan dövləti tərəfindən bənqal toplumunun rəsmi dili kimi qəbul edilmədi və yerinə urdu dili rəsmi dil kimi bu topluma diktə olundu. Etirazlar polis tərəfindən ağır şəkildə cavab verildi və 21 fevral (şubat) 1952- ci ildə 4 bənqal öyrəncisi Pakistan polisi əli ilə öldürüldü.

Bugün Güney Azərbaycanda və İran adlanan ölkədə Türk dilinin yasaqlanmasından 92 il ötür. Fars molla rejimi hələdə Pəhləvilərin anti-türk siyasətini davam etdirir və Türklərə və qeyri fars millətlərə fars dilini rəsmi dil kimi diktə edir.

Milyonlarla Türk uşağı Güney Azərbaycanda və İran adlanan ölkənin fars oxullarında Fars dilindən dolayı ruhi işkəncələrə məəruz qalır və mənsub olduğu millət və dilə görə təhqir olunurlar. Fars dili istismarçı fars rejimi tərəfindən uşaqlarımızın beyninə soxulur və türk dili asimilə edilir. Türk dili müdafiəçiləri həbs və işkəncə olunur və nəhayət ya öldürülüb və ya sürgünə məcbur edilirlər. Artıq türk dili və kimliyi İran adlanan ölkənin fars rejimi tərəfindən hədəflənir.

Biz Güney Azərbaycan partiyaları və siyasi təşkilatları fars rejiminin qeyri fars millətlərə özəlliklə Güney Azərbaycan Türk millətinə qarşı bu ırqçı siyasətini qınayır və bütün millətimizi bu yolda dirənməyə və geniş şəkildə mübarizəyə dəvət edirik.

Yaşasın Ana Dilimiz,

Yaşasın Azərbaycan,

- Azərbaycan Demokratik Birliyi- BİRLİK

- Azərbaycan Öyrənci Hərəkəti- AZOH

- Dünya Azərbaycanlıları Konqresi- DAK

- Güney Azərbaycan Demokrat Partiyası- GADP

- Güney Azərbaycan Liberal Demokrat Partiyası- GALDP

- Güney Azərbaycan Qurtuluş Partiyası- GAQP

- Güney Azərbaycan Sosyal Demokrat Partiyası

- Vahid Müstəqil Azərbaycan Cəbhəsi

  20-02-2017

1948 و 1952- جی ایللر آراسی تاریخی اولای‌لار دونیا آنا دیلی گونو یازیلماسینا ندن اولدو. بو ایللرده بنگال دیلی پاکیستان دؤولتی طرفین‌دن بنگال توپلومونون رسمی دیلی کیمی قبول ائدیلمه‌دی و یئرینه اوردو دیلی رسمی دیل کیمی بو توپلوما دیکته اولوندو. اعتراضلار پولیس طرفین‌دن آغیر شکیلده جاواب وئریلدی و 21 فئورال (شوبات) 1952- جی ایلده 4 بنگال اؤیرنجی‌سی پاکیستان پولی‌سی الی ایله اؤلدورولدو.

بوگون گونئی آذربایجاندا و ایران آدلانان اؤلکه‌ده تورک دیلی‌نین یاساقلانماسین‌دان 92 ایل اؤتور. فارس موللا رئژیمی هله‌ده پهلوی‌لرین آنتی-تورک سیاستینی داوام ائتدیریر و تورک‌لره و قئیری فارس میللت‌لره فارس دیلینی رسمی دیل کیمی دیکته ائدیر.

میلیون‌لارلا تورک اوشاغی گونئی آذربایجاندا و ایران آدلانان اؤلکه‌نین فارس اوخول‌لاریندا فارس دیلین‌دن دولایی روحی ایشکنجه‌لره معروض قالیر و منسوب اولدوغو میللت و دیله گؤره تحقیر اولونورلار. فارس دیلی ایستیسمارچی فارس رئژیمی طرفین‌دن اوشاق‌لاریمیزین بئینینه سوخولور و تورک دیلی آسیمیله ائدیلیر. تورک دیلی مودافیعه چی‌لری حبس و ایشکنجه اولونور و نهایت یا اؤلدورولوب و یا سورگونه مجبور ائدیلیرلر. آرتیق تورک دیلی و کیم‌لیگی ایران آدلانان اؤلکه‌نین فارس رئژیمی طرفین‌دن هدف‌لنیر.

بیز گونئی آذربایجان پارتیا‌لاری و سیاسی تشکیلات‌لاری فارس رئژیمی‌نین قئیری فارس میللت‌لره اؤزل‌لیکله گونئی آذربایجان تورک میللتینه قارشی بو ایرقچی سیاستینی قیناییر و بوتون میللتیمیزی بو یولدا دیرنمه‌یه و گئنیش شکیلده موباریزه‌یه دعوت ائدیریک.

یاشاسین آنا دیلیمیز،

یاشاسین آذربایجان،

- آذربایجان دئموکراتیک بیرلیگی- بیرلیک

- آذربایجان اؤیرنجی حرکتی-آذوح

- دونیا آذربایجان‌لی‌لاری کونقرئسی- داک

- گونئی آذربایجان دئموکرات پارتیاسی- گادپ

- گونئی آذربایجان لیبئرال دئموکرات پارتیاسی- گالدپ

- گونئی آذربایجان قورتولوش پارتیاسی- گاقپ

- گونئی آذربایجان سوسیال دئموکرات پارتیاسی

- واحید موستقیل آذربایجان جبهه‌سی

  20-02-2017