آذوح: امیر مردانی پرئزیدئنت سئچکی‌لرینی بویکوت ائدیب اما شورا سئچکی‌لرینده ایشتیراک ائتمیین و یا اهالینی بعضی شهرلرده سس وئرمه‌یه، دیگر شهرلرده ایسه قاتیلماماغا چاغیرماغین ضدیت‌لی بیر سیاست اولدوغونو و آذربایجان میللی حرکاتینا ضرر وئره بیلجیینی ایفاده ائدیر.
آذوح وئب صحیفه‌سی‌نین رئداکتورو (آذوح قروپون سوزچوسو) آمئریکانین سسی ایله صحبتده قارشی‌دان گلن پرئزیدئنت و شورا سئچکی‌لرینه دایر تورک فعال‌لارین موناسیبتینی و فعالیت‌لرینی دیرلندیریب.
امیر مردانی میللی حرکاتا منسوب قروپ‌لاری سئچکی‌لره دایر موناسیبت‌لرینه گؤره اوچ کاتئقوریایا آییریر.
“سئچکی‌لره دایر باخیش‌لاری اوچ کاتئقوریایا بؤلمک اولار: سئچکی‌لرده ایشتیراک ائدک گئدک سس وئرک؛ یا سس وئرمیک ساده‌جه یارانمیش فورصت‌دن یارارلاناق؛ یا دا بوتونلوکله بویکوت ائدک یعنی نه یارانمیش آتموسفئردن ایستیفاده ائدک نه ده گئدیب سس وئرک،” دئیه او سؤیلییر.
مردانی همچی‌نین بعضی فعال‌لارین سئچکی‌لرله باغلی ضدیت‌لی فیکیرلر سسلندیردیگینی اؤنه چکیر. اونون فیکرینجه، بو نؤو فیکیرلر میللی حرکاتین قئیری-جدی گؤرونمه‌سینه سبب اولا بیلر:
“بعضن گؤرونور کی، بیزیم فعال‌لار عمومیتله پرئزیدئنت سئچکی‌لرینی بویکوت ائتمک ایستییر، اما شهر و کند شورا‌لاری سئچکی‌لری ایله باغلی گلیب عکسینی اعلان ائدیرلر. دئییرلر کی، شورا سئچکی‌لرینه قاتیلا بیلریک. بو دوغرو دئییل. بو نؤو باخیش حرکاتین جیددیتینی آلا بیلر.”
او، علاوه ائدیر، “اگر بیز دئییریک سئچکی‌لرده پروبلئم واردیر، ساختاکارلیق واردیر یا بیزیم نماینده‌لرین نامیزد اولماسینا ایجازه وئرمیرلر، اما سونرا مثال اوچون قربی آذربایجان ویلایتینده میللتی سس وئرمه‌یه چاغیریریق. او زامان میللتین طبیعی اولا‌راق حاقی وار بیزدن سوروشسون کی، اگر سس وئرمک یاخشی‌دیر، ندن بیز پرئزیدئنت سئچکی‌لرینده سس وئرمیک؟ ندن تبریزده سس وئرمیک؟ دوغرو دئییلسه، ندن شورا سئچکی‌لرینده اورمییه‌ده یا سولدوزدا سس وئرملیگیک؟”
"""باتی آذربایجان دا کورد سورونو وار، چوخ دا جیددی دیر، آما بو سورونون چوزولمه سی صاندیقلار باشینا گئتمک دئییل بلکی باشقا یول تاپیلمالیدیر. صاندیقلار باشینا چاغیرماغیمیز بیزی میللتدن اوزاقلاشدیریر. میللتی کورد سورونو حاقدا اویاندیرماق گرکیر، آما بو آیدینلاتماغین سونوجو میللتی صاندیق باشینا چاغیرماق اولمامالیدیر."""
امیر مردانی ایران ایسلام رئسپوبلیکاسی‌نین تشکیل ائتدیگی سئچکی‌لره قاتیلیب سس وئرمه یین دوغرو اولمادیغینا ایناندیغینی دیله گتیریر.
او دئییر کی، “بیز سس وئرمه یی دوغرو بیلمیریک. بو سیستئم دوغرو بیر سیستئم دئییل. بیزیم نامیزدلره ایجازه وئرمیرلر. هئچ بیزدن اولمایان باشقا موستقیل نامیزدلره ده ایجازه وئرمیرلر. آیریجا، سس‌لری اوخوماقدا دا ساختاکارلیق اولور. مادام کی، میللتین سسی دوغرو عکس اولونمور، او زامان قاتیلماغی دا دوغرو گؤرموروک.”
بعضی تورک فعال‌لار شهر و کند شورا‌لاری سئچکی‌لرینه نامیزدلرین قئیدیاتا آلینماسی پروسئسینده نظارتین نیسبتن داها آز اولماسینی ایره‌لی سوره‌رک میللی حرکاتین شورا سئچکی‌لرینده تأثیر گؤستره بیله جه یینی دئییرلر.
امیر مردانی نظارتین داها آز اولدوغونو تصدیق ائتسه ده، بونون سئچکی‌لره قاتیلماق اوچون یئترلی سبب اولمادیغینی دوشونور.
“بو فیکرین دوغرو طرف‌لری واردیر. یعنی نظارتین آز اولدوغو دوغرودور. شهر شوراسی نامیزدلری‌نین قئیدیاتا آلینماسیندا نظارت آزدیر. اما بیز یئنه ده عینی یئره چاتیریق. ایکی ساندیق قویورلار. بیری پرئزیدئنت سئچکی‌لری، بیری ده شورا سئچکی‌لری اوچون. نهایتده ده بو ساندیق‌لاری سایان سیستئم و شخص‌لر عینی‌دیرلر. عینی قوروم‌لار اونلاری یوخلاییب و نتیجنی تصدیق ائدیر،” دئیه او علاوه ائدیر.
علیرضا قولونجو
http://www.amerikaninsesi.org/a/musahibe-amir-mardani/3844058.html
http://bao.az/categories_Siyaset/subcategories_Guney-azerbaycan-siyaset/product_8952557232
