آمئریکانین سسی ایله صحبتده گونئی تشکیلات‌لاری‌نین فعالیت و پروبلئم‌لرینی دیرلن‌دیرن امیر مردانی اؤلکه داخیلینده یاشایان فعال‌لارین کوللئکتیو فعالیت سرگیلمک باخیمین‌دان خاریج‌دکی‌لردن داها اوغورلو اولدوق‌لارینی ایفاده ائدیر. گونئی آذربایجان اتفاقی‌نین عضوو و آذوح وئب صحیفه‌سی‌نین رئداکتورو (آذوح قروپون سوزجوسو)نون فیکرینجه، تورک فعال‌لارین فردی فعالیته داها چوخ اوستونلوک وئرمه‌سی‌نین بیر عاملی خاریج‌دکی تشکیلات‌لارین بیر چوخونون فردلر سویه‌سینده بئله فعالیت گؤستره بیلممه‌سی‌دیر.
“پروبلئم‌لریمیزدن بیری بودور کی، بیزیم چوخ سایدا تشکیلاتیمیز وار، اما بون‌لارین بیر چوخونون فعالیت‌لری ساده‌جه کاغیذ اوزرینده عکس ائدیلیر. بو دا میللی فعال‌لاری سویودور و تشکیلات‌لاردان اوزاقلاشدیریر. اونلار گؤرور کی، بعضی تشکیلات‌لارین هئچ بیر فعالیتی یوخ‌دور و فردی فعالیت‌لر بیر چوخ تشکیلاتین فعالیتین‌دن داها اوستون‌دور،” امیر مردانی سؤیلییر.
او، علاوه ائدیر، “داخیلده دیرلی میللی فعال‌لاریمیز وار. قروپ اولوب فعالیت ائدیرلر. 5 نفر گئدیرلر آکتیو شکیلده چالیشیرلار. توتولوب هبس ائدیلیرلر... یعنی گؤرورسن کی، نیزامنامه‌سیز، اساسنامه‌سیز فعالیت‌لر اولور کی، بیر چوخ تشکیلاتین نیزامنامه‌لی، اساسنامه‌لی فعالیتین‌دن داها اوستون‌دور.”
امیر مردانی‌نین دئدیک‌لرینه گؤره، حاکمیتین باسقی‌سی آلتیندا اولمایان خاریج‌دکی تشکیلات‌لار اصلینده داها اوغورلو فعالیت سرگیلمه‌لی ایدی‌لر:
“بو دوروم تام عکسینه اولما‌لی ایدی. فعالیت‌لر خاریجده داخیل‌دن داها گوج‌لو اولما‌لی ایدی. ایچریده اولان میللی فعال‌لارین اوزرینده طبیعی کی، باسقی‌لار وار، تهلوکه‌سیزلیک قایغی‌سی وار. اما بیر گئرچک ده وار کی، ایچریده کادر باخیمین‌دان چوخلوق واردیر... بیر ده کی، تهلوکه‌سیزلیک قایغی‌لارینی نظره آلاندا بئله، اؤلکه داخی‌لی میدان فعالیتی اوچون داها الوئریش‌لی‌دیر.”
ایسوئچده یاشایان میللی فعال همچی‌نین قروپ‌لار و تشکیلات‌لار آراسین‌داکی علاقه‌لره ایشاره ائده‌رک، اؤلکه داخیلینده فعالیت گؤسترن فال‌لارین بو کونتئکستده ده داها اوغورلو حرکت ائتدیک‌لرینی وورغولاییر.
اونون سؤزلرینه گؤره، “ایچریده قروپ‌لار و تشکیلات‌لار آراسین‌داکی علاقه‌لر داها گوج‌لو اولور. چونکی، هر بیر تشکیلات و هر بیر قروپ اؤز عضو‌لرینه میدان فعالیتی‌نین هیه‌جانینی وئره بیلیر. فرق‌لی قروپ‌لار بیر-بیرلرینه خور باخما‌دان، یوخاری‌دان باخما‌دان علاقه‌ده اولورلار. اما خاریجده بئله اولمور...”
مردانی‌نین فیکرینجه، خاریجده فعالیت گؤسترن گونئی‌لی تشکیلات‌لارین اوغورسوزلوغو اونلارین بیر-بیرلرینه هوجوم ائتمه‌سینه ده سبب اولا بیلیر.
“بلکه ده اوغورسوز اولدوغوموز اوچون، دوزگون فعالیت گؤستره بیلمدیگیمیزه گؤره، میللته جاوابدئه اولا بیلمیریک و بونو اؤرت-باس ائتمک اوچون آقرئسسیو اولوب دیگر تشکیلات‌لارا هوجوم ائتمه‌یه کئچیریک... طبیعی کی، من آیلارلا فعالیت ائتمه‌سم، دئمه‌یه سؤزوم اولماسا، باشلایاجاغام اونا بونا هوجوم ائتمه‌یه. فرد اولا‌راق دا، تشکیلات اولا‌راق دا،” میللی فعال علاوه ائدیر.
امیر مردانی همچی‌نین خاریجده قرارگاه‌لانان گونئی تشکیلات‌لاری و میللی فعال‌لار آراسیندا تنقید مدنیتی‌نین گوج‌لو اولمادیغینا دقت چکیر.
https://www.amerikaninsesi.org/a/amir-mardani/3989221.html
https://www.amerikaninsesi.org/a/3994321.html
