تاریخ ایله یاشاماغی بوراخیب تاریخدهن درس آلماغا و تاریخ یازماغا باشلامالی‌ییق. کئچمیشده‌کی قازانج لاریمیز ایله اؤوونوب، ایندیکی قازانا بیله‌جک‌لریمیزده‌ن واز کئچرسک گله‌جک اوچون هئچ بیر یازیلاجاق و اؤووناجاق تاریخ بوراخابیلمه‌ریک.
حال حاضیرداکی فرصت‌لری یاخالاییب اؤز نفعیمیزه چئویرمه‌ک چوخلو قازانجلارا سبب اولا‌بیلر . او اوزده‌ن ایسته‌کلریمیزده اقتدارلی و مسمم اولمالی‌ییق. یوخسا کئچن گونلر بیر داها گئری گلمز، الده‌ن وئردیکلریمیزی گئری آلماق اوچون چوخ هزینه‌لر خرج ائتمک زوروندا قالاریق.
کئچیجی اعتراضلار ، آکسیالار و بونلارین هر ایل دؤنومونده هر کئچن ایل داها ائتکیسیز حالا گلن اعتراضلار و آجیماسیز، غاصب موللا رئژیمینین گونو گونده‌ن آرتان حاقسیزلیقلاری ، فاشیست و ایرقچی دوشونجه‌لرینین قارشیسیندا آنجاق آغیر-آغیر هزینه لر وئره‌رک گوجوموزو الده‌ن وئرمک آنلامینا گلیر. اونا گؤره تاریخی تکرار-تکرار یاشاماق دئییلده ، تاریخدهن درس آلمالی‌ییق. کئچمیشده هر هانسی یؤنده خطا یاپمیشساق او یؤنوموزو گوجلندیررسک یولا داوام ائتمک داها قولای بیر فورم آلابیلر ، آمما آینی خطالاری نه یازیق کی هر اولایدا تکرار حالتینه گلمیش دوروموندادیر.
رئژیمین سایماق‌ایله بیتمک بیلمه‌ین کیملیکیمیزه ، تاریخیمیزه ، کولتوروموزه و تام آنلامیندا بوتون وارلیغیمیزا قارشی ائتدیغی حقارتلر، حاقسیزلیقلار و یوروتدوغو ایرقچی سیاستی گونو گونده‌ن آرتماقدادیر. هاردایسا ان آزی هفته‌ده بیر بو چیرکین دوشونجه‌سین هر تک تکیمیز گؤروروک ، آنجاق بونلارین قارشیسیندا گوجلو دورماقلا سون دئمک اولار .
گوجلو مئدیا، گوجلو سؤزجو ، گوجلو پلانلاییجی و ان اؤنملیسی گوجلو بیرلشدیریجی ( هر کسی بیر آرایا توپلایان دوشونجه) ایندیکی دورومدا ان حیاتی احتیاج‌لاریمیزدان بیریدیرلر. و بونلار آنجاق بیر آرادا اولورسا گوجلو اولور.
آرتیق سون دئمک اوچون هر کسین قوللارینی چیرمالاییب و مئیدانا گیرمه‌سی لازیمدیر و بو سفر بیر ائتکی‌له‌ییجی تاریخین یازیلماسی اوچون چابا گؤسترمه‌لی‌ییک ، تاریخ‌ایله یاشاماغی بوراخیب تاریخدهن درس آلماغا و تاریخ یازماغا باشلامالی‌ییق، یوخسا اریییب یوخ اولماغی گؤزله‌مه‌لیییک.
باشقالاری وارلیغیمیزین و بو گونه‌دک صاحیب اولدوقلاریمیزی گلیب الیمیزده‌ن آلمالارینی ایزله‌ین بیری اولماماق اوچون باشلامالی‌ییق./
آرش مکاریدوست نیکی کند
آذوح- تورکیه تمسیلچی‌سی
